HStAOrient5a: 35v

meşḥūndur. Eflāṭūn‑i ilāhīnüñ nübüvveti mertebe‑i ẓann müntehīdür. Nite‑kim // baʿżı eḥādīs̱de vāqiʿdür ki aṣḥāb‑i resūlu llāhdan birisi İskenderīyeye // sefer ėdüb ʿavdet ėtdüklerinde meclis‑i resūlu llāhda ʿ-m gördügi // ʿacāyibden suʾāl olınub dėdi ki: Bir qavm gördüm‑ki siyāh‑pūşlar[dur] ki Eflāṭūn‑i ilāhīnüñ ẕikrin iks̱ār ėderler. Baʿżı aṣḥāb‑i resūl Eflāṭūna // laʿn ėtdiler. Resūlu llāh ʿ-m laʿnı nehy ėdüb eyitdi: Lā fa‑inna Aflāṭūna // kāna nabīyan ǧahilahū qawmuhū. Ve Soqrāṭuñ nübüvvetine ʿulemādan ve ḥükemādan // qavl vardur. Eflāṭūn ḫod anuñ şāgirdidür ve silsile‑i Soqrāṭ // Loqmāna müntehīdür ki ṣāḥib‑i Dāvūd ʿaleyhi s‑selāmdur. Ve bi‑l‑cümle silsile‑i // İşrāqīyūn ve Meşşāʾūn cümlesi aṣḥāb‑i Sefārīyeye müntehīdür. Bu // taqdīrce bunlar milel‑i enbiyādan bir milleti mültezim degül idügine cāzim // olmaq lāzım degüldür. Mültezim olmaduqları taqdīrce daḫı küfr lāzım // gelmez. Zīrā enbiyāʾ‑i sābıqanuñ nübüvvet‑i ʿāmmeleri yoq idi. // Tevaṣṣul ilā cenābi llāh ḫod bi‑dūni l‑enbiyā mümkindür Üveys‑i Qaranī // gibi mes̱elā. Muḥaṣṣal‑i kelām ekābir‑i ḥükemā muṭlaqā küfre nisbet olınmamaq // gerekdür. Meẕkūr olan ḥükemā devlet-i Muḥammedīyeden muqaddem olanlardur. // Ammā ḥükemāʾ‑i İslām ki zamānları devlet-i Muḥammedīyeye muvāfaqat ėtmişdür anlar // mültezim‑i şerīʿat ve muqtebis‑i envār‑i ḥaqīqatdur. Mes̱elā S̱ābit bin Qurra ve Kindī ve Fārābī // ve İbn Sīnā gibi Mevlānānuñ kelāmı tamām oldı.